Të hënën nis vaksinimi kundër Covid-19 në vend.
Përmes një postimi në Facebook, Rama shkruan:
“Pak orë nga nisja e fushatës së vaksinimit #ShqipëriaBuzëqesh🌼 duke ju marrë pak minuta nga koha juaj, për të hedhur vështrimin pas në orët, minutat, ditët, javët e muajt e jashtëzakonshëm të luftës me Armikun e Padukshëm, e cila sot hyn në fazën e ofensivës së madhe për largimin e tij përfundimtar nga jeta jonë, ju uroj një javë të mbarë😍”
Qeveria ka siguruar 500 mijë doza të vaksinës anti-Covid prodhuar nga kompanitë Pfizer dhe BioNTech.
Kryeministri Edi Rama deklaroi më 1 Janar se 10750 dozat e para të vaksinës kundër COVID-19 do të vijnë në Shqipëri në javën e tretë të janarit.
30250 doza të tjera do vijnë në shkurt, tha Rama dhe të tjerat me radhë muaj pas muaj në bazë të planit të vaksinimit.
Ndërkohë pak ditë më parë, kryeministri Edi Rama inspektoi stadiumin Air Albania së bashku me ministren e Shëndetësisë Ogerta Manastirliu. Stadiumi do të shërbejë si qendra e parë e vaksinimit.
Rama ka deklaruar se është dakordësuar me kompaninë Pfizer që vaksinimi të nis në javën e tretë të janarit. Ai ka thënë se të parët do të vaksinohen mjekët.
