Policia e Sarandës sekuestroi sot hotelin Santa Quaranta dhe 25 apartamente në Sarandë në pronësi të Klement Balilit, në kërkim për trafik ndërkombëtar droge. Gjykata vendosi për sekuestrimin e pronave të Balilit 18 muaj pasi autoritete greke sollën kërkesën për arrestimin e tij, duke e cilësuar si “baroni i drogës së Ballkanit”.
Aktiviteti i biznesit dhe pasuritë e pajustifikuara të Zotit Balili duhet të ishin sekuestruar me kohë. Madje ato duhet të kishin ngjallur dyshime dhe duhet të ishin bërë objekt i ndërhyrjes së dhjetra institucioneve shtetërore, në nivelin lokal dhe qëndror shumë kohë përpara kërkesës së policisë greke.
Por asnjë institucion nuk ka vepruar. Klement Balili deri në momentin e publikimit të dosjes së ardhur nga Greqia kundër tij mbante postin e Drejtorit të Transportit në Sarandë, detyrë te cilën e kryente që nga viti 2013.
Madje ai pavarësisht urdhërave të arrestit nga dy shtete dha një intervistë për gazetën greke Ethnos, më 30 tetor 2016, ku u shpreh se akuzat ndaj tij janë politike dhe bëhen me qëllim për të dëmtuar kryeministrin Edi Rama.
E gjithë çështja Balili ka dëshmuar dhe vazhdon të dëshmojë edhe sot dështimin total të gjithë strukturave ligjzbatuese në të gjitha nivelet e pushtetit në Shqipëri.
