250 minatorët e ngujuar në minierën e Trepçës përfunduan grevën e tyre, raporton Radio Evropa e Lirë.
Ky vendim erdhi pasi Ministria e Ekonomisë në Kosovë konfirmoi se do të kalojë në llogaritë e tyre pagat e muajit tetor.
“Greva ka përfunduar, minatorët kanë dalë nga miniera aty ku kanë qëndruar disa, nga dita e mërkurë e disa që nga mëngjesi i ditës së sotme. Greva është ndërprerë pasi që janë informuar se pagat do t’iu dalin në xhirollogari”, pohoi Gani Osmani, nga Sindikata e Punëtorëve të kësaj ndërmarrjeje.
Minatorët u ngujuan të enjten në shenjë proteste për pagat e papaguara.
Javën e kaluar qeveria e Kosovës ka dhënë 1,1 milion € për minierën e Trepçës për ta ndihmuar atë të kapërcejë problemet financiare për shkak të borxheve të grumbulluara.
Kryeministri Avdullah Hoti vendosi se borxhi i minierës arrin në 8 milion €. Pas një takimi me bordin e përkohshëm të minierës të Premten, Hoti tha për median:
“Situata në kompani është shumë e vështirë, kryesisht për shkak të pandemisë […] dhe paaftësisë për Trepça për të shitur produktet e saj në tregjet botërore. Ne gjithashtu duhet të pranojmë se kjo është pjesërisht për shkak të menaxhimit joadekuat të kësaj kompanie”.
Ai i kërkoi bordit të ndërmarrë hapa të menjëhershëm për të përmirësuar planin afatshkurtër të biznesit të kompanisë dhe t’i paraqesë qeverisë një plan afatgjatë për të tërhequr investime të huaja.
Kompleksi i minierave të zinkut, plumbit dhe argjendit i vendosur në qytetin verior të Mitrovicës dikur kishte mbi 23 mijë të punësuar para shpërbërjes së Jugosllavisë, por tani ka vetëm rreth 1200 punonjës.
Pas luftës së Kosovës në 1999, minierat mbetën në territorin e ndarë etnikisht, punëtorët serbë në pjesën veriore të qytetit dhe shqiptarët në jug. Kjo e shtyu kompaninë pranë falimentimit.
Në vitin 2016, parlamenti i Kosovës shndërroi Trepçën në një kompani publike me 80 përqind të aksioneve në pronësi të qeverisë dhe 20 përqind nga minatorët. Serbët e Kosovës pretendojnë të drejta administrimi mbi minierën.
