50 peshkatarë të portit të Sarandës kanë protestuar sot kundër çmimit të lartë të naftës dhe mosdhënien nga qeveria të pagës së luftës.
Peshkatarët sqarojnë se megjithëse çmimi i naftës në bursë ka rënë në mënyrë drastike në gjithë botën dhe anijat e peshkimit e blejnë naftën me çmimin e bursës, kompanitë shqiptare vazhdojnë t’ua shesin naftën atyre me çmimin e zakonshëm.
Kostot e larta të naftës dhe fakti që produktet e tyre nuk po shiten më për shkak të mbylljes së restoranvteve, po i çon ata drejt falimentimin.
Peshkatarët shprehen se megjithëse pagojnë sigurime shoqërore dhe puna është bllokuar për shkak të Covid-19, aplikimet e tyre për pagën e luftës nuk janë pranuar, duke përkeqësuar edhe më tej gjendjen e tyre financiare.
Ata i bëjnë thirrje qeverisë të shohë me prioritet rastin e tyre pasi ata dhe familjet e tyre janë në situatë të vështirë ekonomike prej dy muajsh.
Më parë, për të njëjtat arsye kanë protestuar dhe peshkatarët e Durrësit.
Çmimi i naftës në tregun e huaj ka arritur në nivelin më të ulët historik. Kjo ka ndodhur si pasojë e uljes së kërkesës së tregut, duke qenë se pjesa më e madhe e njerëzve janë në karantinë, ndaj rezervat e naftës kanë tejkaluar kapacitet mbajtëse.
Në shumë vende, çmimi i naftës ka rënë deri në nivel negative, por kjo ulje nuk është reflektuar në çmimin e naftës në vend.
