Prokuroria e Tiranës ka nisur hetimet për shitjen e bombulave të oksigjenit për kurimin në shtëpi të pacientëve me Covid-19.
Shkak për nisjen e hetimeve u bë shpërthimi i një bombule me oksigjen në shtëpinë e një të infektuari, dy ditë më parë.
Prej disa muajsh, me rritjen e numrit të të infektuarve me Covid-19 në vend, është rritur dhe kërkesa për marrjen e aparateve dhe bombulave të oksigjenit në shtëpi.
Pavarësisht se mjekët kanë rekomanduar shpeshherë se bombulat e oksigjenit nuk duhet të përdoren në kushte shtëpie, online ka nisur shitja e tyre ose dhënie me qira.
Prokuroria dyshon se një pjesë e mirë e këtyre bombulave tregohet në mënyrë të paligjshme dhe jashtë çdo standardi.
