Studentët nga të gjitha universitetet publike të Tiranës dhe nga Universiteti Bujqësor i Kamzës kanë bojkotuar sërish mësim sot dhe kanë nisur protestën drejt Ministrisë së Arsimit.
Ata kanë nisur në këmbë marshimet në grupe të ndryshme nga fakulteteti Ekonomik, i Drejtësisë, i Mjekësisë, i Gjuhëve të huaja, i Fililogjisë dhe i Historisë, i Shkencave Sociale, Shkencave Natyrore dhe nga Kamza, duke bllokuar trafikun në shumë rrugë të Tiranës.
Po ashtu në Durrës, Korçë dhe Elbasan studentët kanë nisur protestat në universitetet përkatëse.
Kërkesat e studentëve janë të panegociueshme, siç shprehen ata:
– Shfuqizimi i VKM nr 288 pika numër 4 e cila parashikon pagesë ekstra për çdo provim të përsëritur;
– Përgjysmim i tarifave të studimeve;
– Përmirësim i kushteve të konvikteve;
– Të ketë një përfaqësues të studentëve në bordin e universiteteve.
Njësoj si një ditë më parë, studentët shprehen të vendosur për të mos pranuar takim me Ministren e Arsimit Lindita Nikolla apo me përfaqësues të tjerë të ministrisë dhe për të vazhduar protestat dhe bojkotin e mësimit. Sipas tyre kërkesat që ata kanë shtruar janë shumë të qarta dhe nuk kanë nevojë për dakordësim.
