“Synojmë të rrisim me 10% të ardhurat në buxhetin e shtetit nga fiskalizimi.”
Kështu deklaroi të martën, ministrja e Financave Anila Denaj gjatë një konference për shtyp për mbarëvajtjen e ekonomisë, bashkë me kryeministrin Rama dhe Drejtoreshën e Përgjithshme të Tatimeve Delina Ibrahimaj.
Sistemi i fiskalizimit ka nisur të përdoret pjesërisht që nga 1 janari 2021. Pra nga 1 janari 2021, të gjitha bizneset që lëshojnë fatura për institucionet shtetërore dhe çdo ent publik, mund të lëshojnë vetëm fatura elektronike.
Ky, sipas qeverisë, është hapi i parë i sistemit të ri të fiskalizimit.
Por pak ditë para se sistemi i fiskalizimit të hynte në fuqi, Drejtoresha e Përgjithshme të Tatimeve, Delina Ibrahimaj parashikonte se ndikimi i tij do të ishte më i lartë në buxhetin e shtetit.
Sipas Ibrahimajt, reforma e fiskalizimit do të rrisë të ardhurat tatimore në buxhetin e shtetit me 15 për qind.
Deri më tani as Ministria e Financave dhe as Drejtoria e Tatimeve nuk kanë bërë publike analiza apo studime mbi të cilat janë bazuar pritshmëritë e tyre.
