Kryeministri Edi Rama deklaroi se rreth 300 mijë qytetarë kanë përfituar pagën e luftës ndërsa 760 biznese kanë përfituar nga garancia sovrane.
Gjatë një konference për shtyp të martën, Rama u shpreh se nga masat e qeverisë kanë përfituar 53 mijë punonjës.
“Sot them që janë afër 300 mijë shqiptarë, që kanë përfituar direkt pagë lufte. Sot që flasim janë 560 entitete që kanë përfituar nga instrumenti i parë i garancisë sovrane, një shumë prej 53 milionë eurosh, dhe mbi 200 entitete të tjera që kanë përfituar nga instrumenti i dytë i garancisë. Në total kanë përfituar 53 mijë punonjës.”
Rama pohoi se në fillim të pandemisë në vend humbën punë rreth 33 mijë qytetarë, por në fund të vitit janë rikthyer në punë 20 mijë të tjerë.
Ai theksoi se ekonomia shqiptare do të rimëkëmbet shumë shpejt, sipas raportit të Bankës Botërore.
