Kryeministri Edi Rama akuzoi Bashkimin Europian se po mban peng lëvizjen e lirë të shqiptarëve të Kosovës, për shkak të problemeve të saj të brendshme.
Në konferencën për shtyp pas takimit me kryeministrin Hoti, Rama tha se gjithnjë e më tepër, BE po reflekton problemet e saj të brendshme, në vendimmarrjet për vendet e Ballkanit Perëndimor:
“Është një turp për Bashkimin Europian që sot e gjen ditën mban dhe peng një popull që ende ndalohet të lëvizë lirisht si gjithë të tjerët në Europë.
E dimë arsyen se pse. Arsye nuk gjendet në Kosovë, pasi si shtet i ka përmbushur të gjithë detyrimet që duhet para liberalizimit të vizave.
Arsyesja është në politikën e brendshme të BE-së, e vendeve të BE-së, që kur marrin vendime për ne, nisen nga kalkulimet për qëndrueshmërinë elektorale të forcave qeverisëse.
Ky nuk është turp, por turpi është që Kosova nuk lëviz e lirë.”
Prej disa muajsh tashmë, europarlamentarja gjermane Viola von Cramon-Taubadel ka deklaruar se Kosova i ka plotësuar kriteret për liberalizimin e vizave dhe tashmë vendimi është në dorën e Parlamentit Europian.
Në një intervistë për Koha.net, Von Cramon-Taubadel, e cila është dhe raportuesja në PE për zgjedhjet në Kosovë, shprehu besimin se nga 1 korriku 2020, kur Gjermania të marrë drejtimin e Këshillit të BE-së, ka më shumë gjasa që Kosovës t’i liberalizohen vizat.
Pak ditë më parë, 33 europarlamentarë të Grupit të Partive Popullore Europiane i kërkuan kancelares së Gjermanisë, Angela Merkel të liberalizohen vizat më Kosovën, pasi i ka përmbushur kriteret.
