Kryeministri Rama uroi Vitin e Ri përmes një video-mesazhi ku në qendër ishin përballimi i pasojave të tërmetit dhe pandemisë dhe politikat e planifikuara për vitin 2021.
Pandemia që dominoi vitin që lam pas “ishte ishte një kafshatë e pakapërdishme” pas goditjes nga tërmeti, tha Rama.
Megjithatë sipas kryeministrit ndërtesat e shembura nga tërmeti po rilindin përditë dhe pasojat e pandemisë pritet të rekuperohen vitin e ardhshëm duke nisur me vaksinimin.
“Ne qëndruam dhe i rezistuam tërmetit. Shkollat e shembura po rilindin më të bukura. Po rilindim përditë më të bukura dhe më të forta dhe shtëpitë e goditura nga tërmeti. Ne po hapim dyert e shtëpive për ta njëra pas tjetrës. Puna vazhdon çdo ditë, çdo natë falë 25 mijë punëtorëve të angazhuara si një trup i vetëm deri kur të hapet dera e fundit për familjet e prekura nga tërmeti. Tani vazhdon lufta për të siguruar vaksinën dhe për të nisur vaksinimin fillim vitin e ardhëm sipas planit strategjik të hartuar që si kudo në botë do të nisim me grupet më të rrezikuara, bluzat e bardha menjëherë, mësuesit efektivët e policisë. Vaksina do të jetë falas dhe jo e detyrueshme”
Rama paralajmëroi se situata e pandemisë nuk pritet të mbarojë para fundit të vitit të ardhshëm, por kjo sipas tij nuk është arsye për të qenë pesimistë pasi vendi nuk është në gjendjen e 7 viteve më parë.
“Nëse tërmeti e pandemia do ndodhnin 7 vjet më parë, vështirë të përballoheshin. kemi bërë përpara edhe me infrastrukturën”
Para se të uronte Vitin e Ri, kryeministri renditi të mirat që na presin vitin e ardhshëm si rritja e pagave për mësuesit dhe mjekët, heqjen e taksave për biznesin e vogël dhe rritjen e pagës minimale.
“Më të keqen e kemi lënë pas. Gëzuar Vitin e Ri dhe qoftë një vit sa më i mbarë. Kjo qoftë dekada më e mbarë për historinë tonë. Zoti bekoftë Shqipërinë dhe shqiptarët”.
