Përfaqësuesit e Sindikatës së Pavarur të Trafikut Ajror akuzuan Këshillin Mbikëqyrës të “Albcontrol” sh.a,për shkelje të një sërë rregulloresh dhe manualesh të sigurisë së trafikut ajror.
Në një takim me Presidentin Ilir Meta, të enjten, ata u shprehën se këto shkelje “vënë në rrezik individualisht dhe kolektivisht të gjithë trupën e kontrollorëve të trafikut ajror, shoqërinë “Albcontrol” sh.a. por njëkohësisht dhe sigurinë e hapësirës ajrore të Republikës së Shqipërisë”.
Ata, sipas njoftimit të zyrës së Presidencës, sqaruan se “për të njëjtën problematikë”, edhe organizata evropiane e trafikut ajror “i kanë kërkuar qeverisë dhe autoriteteve përgjegjëse vlerësimin me seriozitet të kësaj situate, respektimin e të drejtave të kontrollorëve shqiptare”.
Meta i shprehu mbështejen e tij përfaqësuesve të Sindikatës dhe bëri thirrje për dëgjimin e kërkesave të tyre.
