Vaksina e Oksfordit dhe AstraZeneca është e sigurt dhe efikase dhe krijon një mbrojtje të mirë ndaj COVID-19, sipas një studimi të shkenctarëve në “The Lancet”.
Rezultatet tregojnë se vaksina mund të reduktojë përhapjen e Covid si dhe mbron ndaj sëmundjes dhe vdekjes.
Pjesa më e madhe e personave që morën pjesë në këtë studim ishin më të rinj se 55 vjeç, por ai tregon se vaksina është efektive edhe te më të moshuarit.
Ekipet e rregullatorëve që kanë parë të njëjtat të dhëna po konsiderojnë mundësinë që të lejojnë përdorimin e vaksinës së Oxford dhe AstraZeneca për qëllime emergjence. Por ka ende pikëpyetje në lidhje me dozën që duhet përdorur.
Rreth dy javë më parë kur u prezantuan rezultatet paraprake të testimeve klinike, grupi i studiuesve të vaksinës raportoi 3 nivele efikasiteti me një mesatare prej 70%, por që mund të varionte nga 62% deri në 90%. Kjo sepse doza të ndryshme vaksine ishin përdorur gjatë testimeve pasi disa vullnetarëve iu ishin dhënë vetëm gjysmë doze nga ajo e planifikuar.
Raporti i Lancet zbuloi se 1,367 njerëz morën gjysmën e dozës në injektimin e parë dhe më pas një dozë të plotë, e cila u dha atyre 90% mbrojtje ndaj Covid-19.
Numri relativisht i vogël i personave të testuar do të thotë se është e vështirë të nxjerrësh përfundime të sigurta sipas studiuesve.
