Kryeministri Edi Rama prezantoi sot projektin e rindërtimit të banesa të dëmtuara nga tërmeti.
Në konferencën për shtyp, Rama premtoi se shtëpitë e reja për familjet e prekura do të jenë gati brenda vitit 2020.
Ai premtoi se familjet më të prekura dhe me më pak të ardhura do të përfitojnë të para nga procesi i rindërtimit.
Exit News sjell më poshtë premtimet që Kryeministri Rama bëri sot për procesin e rindërtimit:
– Rindërtimi do të nisë nga familjet më të prekura dhe me më pak të ardhura dhe mundësi për të dalë nga kjo situatë e vështirë pas tërmetit, të cilët janë të detyruar të qëndrojnë pranë shtëpisë së rrënuar sepse nuk mund të shkëputen nga shtëpia, gjëja e gjallë.
– Familjet e prekura që kanë humbur shtëpitë do e kalojnë Vitin e Ri në shtëpi të pakrahasueshme me ato që humbën.
– Ato familje me disa kurora që kanë humbur një shtëpi do marrin aq shtëpi sa kanë kurora.
– Shtëpitë do të jepen falas, shumë më të mira se ato që i kishin. Nuk do të rindërtohet vetëm hapësirën e shtëpisë, por të gjitha strukturat.
– Blloqet e reja të ndërtimit do jenë në të njëjtin nivel cilësie si ato që blejnë të pasurit në Tiranë dhe Durrës dhe do jenë falas. Kjo është sfida jonë.
– Sot kur sheh Spitallën duket sikur po i çon njerëzit në një hapësirë pa lidhje. Nesër do të jetë një zonë e re ekonomike me një park ekoologjik.
– Thumana kur ne të japim çelësin, nuk do të ketë lidhje me Thumanë ku ata jetonin.
Kryeministri Rama tha se i gjithë procesi i rindërtimit do të monitorohet nga ndërkombëtarët, të cilët në Konferencën e Donatorëve mbështetën Shqipërinë me dhurime, grante dhe kredi.
