Një grup qytetarësh të huaj që jetojnë në Shqipëri dhuruan sot gjak në Qendrën Kombëtare të Transfuzionit të Gjakut në Tiranë.
Pas njoftimeve për mungesë gjaku në spitalet shqiptare, gazetarja e Exit, Alice Taylor, organizoi këtë aktivitet i cila do të pasohet me një seri të dhurimesh gjaku në Vlorë, Sarandë dhe Durrës në javët e ardhshme.
Shqipëria vuan nga mungesa e depozitave të gjakut por gjendja është përkeqësuar më tej nga pandemia e COVID-19. Kufizimet dhe masat parandaluese kanë dekurajuar ata që dhuronin gjak ndërsa disa kanë frikë të shkojnë në qendrat e dhurimit. Aktiviteti i sotëm u krijua për të demonstruar se nuk ka asgjë për t’u frikësuar dhe se të gjithë mund të dhurojnë gjak pa probleme.
Mungesa e gjakut ka sjellë probleme të mëdha jo vetëm në kryeqytet, por në zona të tilla si Lushnje dhe Fier. Këto qytete kanë shkallë të lartë të sëmurëve me talasemi, të cilët kërkojnë transfuzione të rregullta gjaku përndryshe do të vuajnë probleme si deformimet e kockave, zmadhim të shpretkës, probleme me zemrën etj.
Shumica e të prekurve janë fëmijë dhe ka raste kur nuk trajtohen për shkak të mungesës së gjakut. Meqenëse ato kërkojnë transfuzione çdo dy javë, kërkesa është konstante por jo gjithmonë mund të plotësohet. Kjo çon në rëndesë të gjendjes shëndetësore për ta, dhe shqetësim për familjet e tyre.
Brunilda Paskali, Këshilltare e Presidentit Meta tha se situata është shqetësuese.
“Ne po luftonim që njerëzit të dhuronin para pandemisë, tani me COVID-19 numrat kanë rënë ndjeshëm. Kjo ka pasoja shkatërruese për familjet që mbështeten në transfuzione, për të mos përmendur ato që mund të kenë nevojë për gjak në rast urgjence “.
Aktiviteti u ndoq nga Ambasadorja Suedeze Elsa Hastad e cila dhuroi gjithashtu gjak. Ajo mbajti një fjalim të shkurtër gjatë të cilit foli për rëndësinë e dhurimit të rregullt të gjakut dhe ndihmës në Shqipëri. Ajo shpjegoi se dhënia e gjakut në Suedi është e popullarizuar dhe rreth 3% e popullsisë e bën atë rregullisht.
Presidenti Ilir Meta mori pjesë gjithashtu për të falënderuar ata që dhuruan gjak. Ai kryeson Aleancën e Dhurimit të Gjakut, e cila u krijua për të inkurajuar shqiptarët të dhurojnë gjak rregullisht. Aleanca synon të bëjë që 2% e popullsisë të dhurojë rregullisht.
“Dua t’ju falënderoj të gjithëve që keni ardhur këtu dhe dhuruat gjak sot. Kjo do të thotë shumë dhe shpresoj se do të ndihmojë në ngritjen e vetëdijes për nevojën e dhurimit të gjakut rregullisht. Faleminderit përsëri për gjithçka që po bëni, ”tha Meta.
Taylor gjithashtu foli shkurtimisht dhe theksoi rëndësinë e të dhënit të diçkaje mbrapsht për vendin pritës.
“Ne të gjithë kënaqemi të jetojmë në Shqipëri – moti, rrezet e diellit, ushqimi, mikpritja dhe mënyra e jetës, ndonjëherë është e drejtë të kthesh diçka. Ka shumë gjëra të vogla që mund të bëjmë për të kontribuar për shoqërinë që na pret. Dhurimi e gjakut dy herë në vit është një gjë e shkëlqyeshme, e sigurt dhe jashtëzakonisht e dobishme për të bërë. Një dhurim mund të shpëtojë jetën e tre personave – është më e pakta që mund të bëjmë. ”
Aktiviteti i sotëm ishte i pari i një serie dhurimesh gjaku që do të zhvillohen në Vlorë, Durrës, Tiranë dhe Sarandë – qytete ku ka numër të lartë të huajsh që jetojnë në Shqipëri.
Ka më shumë se 14,000 banorë të huaj në Shqipëri, kryesisht të përqendruar në Tiranë, Durrës, Vlorë dhe Sarandë. Ndërsa shumë janë këtu për punë, ka një numër në rritje që vjen këtu për të punuar në distancë dhe për të shijuar përfitimet që vendi ofron.
Plani është t’i inkurajojë ata të dhurojnë gjak dy herë në vit, duke iu marrë gjithsej vetëm një orë, për të ndihmuar ata që kanë shumë nevojë për të. Përveç dhurimit, dhuruesit do të marrin një analizë gjaku dhe kontroll të plotë mjekësor falas.
Detajet e aktiviteteve të ardhshme të dhurimit të gjakut në Tiranë, Durrës, Vlorë dhe Sarandë do të shpallen së shpejti.
