Vëzhguesit e kandidatit të pavarur në Dibër janë përplasur me policinë në KZAZ e Bulqizës.
Debreshi ka postuar një video ku denoncon shkelje në procesin e numërimit.
“Pas nxjerrjes jashtë të vëzhgueses së Elton Debreshit nga qendra e votimit 1029, KZAZ e Bulqizës nuk po lejon vëzhguesit tanë që të futen brenda dhe të mbikëqyrin procesin e dorëzimit të kutive të votimit” , njofton Debreshi.
Në videon e publikuar vëzhguesja e Debreshit i kërkon informacion policit në lidhje me ndalimin e saj për të hyr brenda.
Polici përgjigjet se emri i saj nuk është në listën e vëzhguesve. Kur ajo i kërkon që ai ta vërtetoj këtë duke i treguar listën, polici nuk përgjigjet por i kërkon të largohet.
Më pas në video shihet se një person tjetër hyn brenda pa u kontrolluar dhe pyetur, teksa një polic tjetër afrohet dhe i kërkon vëzhgueses së Debreshit të largohet.
“Kjo është shkelje flagrante e ligjit. Vëzhguesit duhet të jene të pranishëm në çdo moment. Keqbërësit e partive kane frike nga votat tona. Po ashtu, policia ne vend qe te respektoje ligjin, behet pale me shkelësit e tij dhe ushtron presion ndaj vëzhguesve”, tha Debreshi në faqen e tij në Facebook.
Gjatë videos vëzhguesja e Debeshit, Joana Meraja zotohet se nuk do të lejojë asnjë votë që të preket.
Ajo shpjegon në video se ndodhet në KZAZ që nga ora 7 dhe sipas rregullores ka kërkuar që të futet brenda që të ndjek të gjithë procesin, por janë ndaluar.
“Nuk jam lejuar të futem në KZAZ e Bulqizës, pa asnjë lloj argumenti. Kam pyetur për këtë, madje efektivit i policisë, më ndaloi të hyja brenda duke më tërhequr nga krahu dhe duke më thënë se do të sjellë një efektive grua që të merret me mua”, tha Joana Meraja vëzhguese e Elton Debreshit në KZAZ e Bulqizës.
Ajo e cilësoi si të paligjshme dhe tha se si çdo vëzhgues tjetër ka të drejtën të ndej procesin nga fillimi e deri në fund.
Kandidati Elton Debreshi ka raportuar disa parregullsi deri më tani.
Më herët ai denoncoi se vëzhguesit e tij u nxorën nga qendra e votimit pa u mbyllur kutitë, ndërsa në dy KZAZ nuk po lejojnë vëzhguesit të futen.
