Kreu i PD-së Lulzim Basha akuzoi sot kryeministrin Rama se ka prishur marrëveshjen e negociuar dje gjatë takimit Rama-Meta-Basha, për dy çështjet e mbetura pa zgjidhje.
“Kur kjo marrëveshje po shkruhej dhe po bëhej gati për firmë ka ndodhur gjëja më absurde me qëllim prishjen e konsensusit në parlament. Dy çështje të dakordësuara që kanë të bëjnë me rolin e ndërkombëtarëve dhe formulën e rakorduar për legjitimimin e misionit ndërkombëtar u ranë dakord dhe ndërkohë që marrëveshja do nënshkruhej, u prish. Kjo është një përpjekje ogurzezë për të shkatërruar konsensusin dhe është në frymën e deklartës së Ramës pasi ne ramë dakord për negociatat”, deklaroi Zoti Basha.
Deklaratën e djeshme të kryeministrit Rama se shumica i ka siguruar 94 vota për të miratuar reformën, Zoti Basha e quajti si tentativë dashakeqëse të kryeministrit për të mos lejuar opozitën të bashkojë votat e saj për një reformë konsensuale, siç e kërkojnë ndërkombëtarët.
“Partia Demokratike i ka gati votat për të votuar më 21 korrik në parim draftin kushtetues dhe pas rakordimit për shtatë ligjet nen për nen të gjithë paketën. Nëse nuk zgjidhen dot dy çështjet e rikthyera, i kam bërë thirrje Kryetarit të Kuvendit që bashkarisht ta zgjidhim këtë në Bruksel për të shpartalluar kështu komplotin e Edi Ramës kundër reformës në drejtësi, të Ramës dhe të klaneve të drogës dhe të cdo klienti të këtij komploti me pashaportë shqiptare apo të huaj”, tha Zoti Basha.
