Para dy ditësh Ministri i Drejtësisë Ylli Manjani, duke folur për luftën ndaj kultivimit të kanabisit u shpreh se:
“Nuk e di të them nëse është emergjencë apo jo, por nëse është e nevojshme për të dhënë një efekt reagues proporcional edhe ushtria mund të dalë. Ne duhet të japim këtë mesazh dhe jam i bindur për këtë. …”
Ndërsa sot Ministrja e Mbrojtjes Mimi Kodheli është kundërpërgjigjur duke thënë:
“Siguria është serioze dhe FA-të janë serioze. Kur flasim për gjëra serioze, duhet të jemi të tillë. Punët në demokraci janë të ndara, secili bën atë që i takon”
Qëndrimi i Zonjës Kodhelit duket i çuditshëm, pasi ajo gjatë këtyre tre viteve më shumë se për çdo gjë tjetër e ka përdorur ushtrinë për të mbledhur plehrat rrugëve dhe brigjeve të Shqipërisë.
Më 6 gusht, kur ushtria nisi aksionin e radhës për pastrimin e vijës bregdetare nga Vlora deri në Ksamil, Zonja Kodheli në një postim në Facebook shkroi se:
“Nuk po kërkojnë pokemona! Nuk janë as pushues, janë pjesëtarë të Forcave të Armatosura, të cilët në 40 gradë kanë nisur sensibilizimin nga Vlora në Ksamil për të mos ndotur mjedisin dhe për ta mbajtur atë pastër. Sensibilizohuni dhe ndiqni shembullin! Nuk mund ta bëjë përherë ushtria”, shkruan në Facebook, ministrja e Mbrojtjes.
Ndërsa shfarosja e kanabisit me të drejtë mund të mendohet se ka rëndësi për sigurinë kombëtare, mbledhja e qeseve plastike nëpër brinja dhe gërxhe nga ushtria duket krejtësisht e pajustifikuar.
Artikull i lidhur:
