Instituti Kombëtar i Shëndetësisë Publike të Kosovës (IKSHPK) njoftoi se Kosova ka regjistruar të mërkurën numrin më të lartë të rasteve pozitive me koronavirus për këtë vit.
Në 24 orët e fundit, katër pacientë me Covid kanë humbur jetën: dy prej tyre në Prizren, një në Fushë Kosovë dhe një në Suharekë.
Pas testimit të 2,532 mostrave janë konfirmuar 568 raste të reja, ku pjesa më e madhe, rreth 233, rezulton në Prishtinë.
Me këto shifra, numri i përgjithshëm i të infektuarve me koronavirus në Kosovë arrin në 70,753 – prej tyre, 3,284 raste u konfirmuan vetëm në shtatë ditët e fundit.
Në total, 1,620 pacientë në Kosovë kanë humbur jetën nga koronavirusi, ndërsa 60,628 janë shëruar – prej tyre 295 në 24 orët e fundit.
Aktualisht janë 8,505 raste aktive me koronavirus në Kosovë.
IKSHPK-ja u rekomandoi qytetarëve që të qëndrojnë në shtëpi dhe të dalin vetëm për nevoja të domosdoshme.
