Në të gjithë Evropën, fillimi i vitit të ri shkollor kishte për qëllim të sinjalizonte një kthim në normalitet të arsmit, pas mbylljes së shkollave dhe zhvillimit të mësimit online që prej marsit.
Vende si Danimarka lejuan shkollat të rihapeshin për pjesën e mbetur të sezonit veror pasi kishte kaluar piku i valës së parë të pandemisë, ndërsa vende të tjera nuk lejuan rikthimin e nxënësve në klasa.
Megjithëse mbetet ende për tu vërtetuar se çfarë roli luajnë shkollat dhe fëmijët në transmetimin e virusit, shumë vende ende nuk e kanë vendosur se si do të zhvillohet viti i ri shkollor.
Exit News sjell më poshtë një përmbledhje se si shtatë vendet e BE-së shpresojnë t’i mbajnë shkollat të hapura dhe njëkohësisht të kenë koronavirusin nën kontroll:
Gjermania
Viti i ri shkollor fillon në data të ndryshme në 16 shtetet federale të Gjermanisë. Në disa vende veriore, si në Berlin, nxënësit tashmë janë rikthyer; në shtetet jugore klasat rifillojnë në shtator.
Arsimi është një kompetencë rajonale, por Akademia Kombëtare e Shkencave të Natyrës të Gjermanisë ka nxjerrë udhëzime, që përfshijnë mbajtjen e maskave për nxënësit nga 15 vjeç e lart, grupe të vogla mësimi brenda shkollave dhe testime të vazhdueshme.
Spanja
Deri tani nuk ka një datë zyrtare për nisjen e mësimit në Spanjë, një ndër vendet më të prekura nga Covid-19.
Disa rajone kanë lajmëruar se mësimi mund të nisë në 7 shtator.
Rekomandimet e qeverisë përfshijnë distancimin social dhe përdorimin e ambienteve të tilla si biblioteka dhe mensa si klasa për të lejuar më shumë hapësirë për nxënësit.
Qeveria rajonale katalanase po punëson 5000 mësues shtesë për të krijuar “grupe” nxënësish edhe jashtë shkollave në mënyrë që të kufizohet numri i nxënësve brenda shkollave.
Rajoni i Madridit synon të punësojë 600 persona staf ndihmë dhe ka propozuar katër plane veprimi të ndryshme në varësi të ashpërsisë së pandemisë, përfshi pjesëmarrjen e pjesshme të nxënësve në klasa dhe mësimin në distancë.
Italia
Shkollat italiane do të rihapen më 14 shtator pasi kanë qëndruar të mbyllura për gjashtë muaj. Stafi do të duhet të veshë maska, dhe qeveria do të vendosë në javën e fundit të gushtit nëse fëmijët më të rritur se 6 vjeç do të duhet ta bëjnë këtë.
Klasat do të jenë më të vogla për të lejuar distancimin social midis 8 milion nxënësve të vendit – që do të thotë se nevojitet hapësirë për klasa të reja. Por sipas shoqatës së drejtuesve të shkollave, Italisë i mungojnë akoma 20 mijë klasa shtesë për gjithsej 400 mijë nxënës.
Autoritetet lokale janë ngarkuar me gjetjen e këtyre hapësirave duke menduar dhe në mënyrë kreative për të modifikuar hapësira të caktuara në klasa.
Danimarka
Shkollat në Danimarkë u rihapën në 10 gusht, pas rënies së numrave të të infektuarve ditorë me koronavirus.
Fëmijët mësonin në grupe më të vogla 10-12 nxënës dhe kjo kërkoi punësimin e mësueve të rinj dhe stafit ndihmës shtesë. Nxënësit uleshin 2 metra larg nga njëri tjetri në klasë dhe lanin duart në çdo orë e gjysmë.
Fëmijëve dhe mësuesve nuk u kërkohej të mbanin maska - dhe Danimarka nuk ka parë një rritje të infeksioneve pasi rihapen shkollat.
Polonia
Polonia planifikon të rihapë shkollat në 1 shtator, përveçse në disa qytete me shkallë më të lartë të infeksionit.
Ministri i Arsimit, Dariusz Piontkoëski vuri në dukje se situata aktuale epidemiologjike “lejon, në pjesën dërrmuese të vendit tonë, në shumicën dërrmuese të objekteve arsimore … një kthim të mësimit standard që mbështetet në kontaktin midis mësuesve dhe studentëve.”
Nuk do të ketë detyrim për të mbajtur maska ose për të kufizuar numrin e nxënësve në klasa, por nxënësve u kërkohet të lajnë duart shpesh dhe të shmangin kontaktin me grupe të mëdha.
Drejtorët e shkollave gjithashtu do të kenë të drejtë të kalojnë në mësimin online ose modele hibride të mësimit nëse rastet e koronavirusit në shkollat e tyre rriten.
Franca
Shkollat franceze do të rihapen më 1 shtator, përveç në zonat e deklaruara si “zona aktive të qarkullimit të virusit” si Parisi ose rajoni i Marsejës, ku shkollat mund të mbeten të mbyllura.
Nxënësit nuk kanë nevojë për distancë sociale në zonat ku mbajtja e distancës është e pamundur, brenda ose jashtë. Sidoqoftë, nxënësit më të mëdhenj se 11 vjeç do të duhet të mbajnë maska brenda dhe jashtë nëse një distancë minimale prej 1 metër nuk mund të garantohet.
Shkollat do të duhet të sigurojnë maska dhe mjete të tjera mbrojtëse për stafin e tyre.
Belgjika
Shkollat belge do rihapen më 1 shtator, pavarësisht rritjes së infeksioneve gjatë verës. Nëse situata epidemiologjike do përkeqësohet në një zonë të caktuar, nxënësit e shkollave të mesme do të ndjekin shkollën në grupe alternative. Mund të bëhen dhe ndryshime të tjera në varësi të pandemisë.
