Lëvizja për Universitetin deklaroi të mërkurën se Rektorati “është tallur” me studentët në përgjigjen që ky i fundit u ka dhënë sa i takon kërkesës së tyre për ulje të tarifës.
Në një njoftim Lëvizja deklaron se heqja tarifave është një domosdoshmëri në kushtet e mësimit online ku studentët nuk po e përdorin infrastrukturën universitare.
Ata deklarojnë:
“Pavarësisht kërkesave dhe pakënaqësisë së vazhdueshme studentore, Ministria e Arsimit nuk ka reaguar, madje nuk ka marrë parasysh as peticionin e nënshkruar nga 8000 studentë për anulimin e tarifave”.
Përgjigja që Rektorati u ka dhënë në lidhje më këtë kërkesë për Lëvizjen është “tallëse dhe e turpshme”.
Në përgjigjen e Rektoratit thuhet se nuk ka ulje të tarifës por është ulur tarifa e regjistrimit nga 2500 lekë në 2000 lekë.
Më herët Lëvizja për Universitetin i ka dërguar një peticion me 8 mijë firma Ministrisë së Arsimit ku kërkonte anulimin e tarifës në kushtet e mësimit online.
Kërkesën e tyre studentët e mbështesin edhe në studime të cilat dëshmojnë se sa efektiv ka qenë mësimi online.
Sipas një studimi të LPU 60% e studentëve shprehen të pakënaqur për mënyrën se si po zhvillohet mësimi online.
Në studim morën pjesë 1570 studentë.
Studimi nxori në pah se 44.5% kanë akses të pjesshëm në internet dhe mbi 70% janë të detyruar t’i ndjekin leksionet përmes telefonit celular.
Ndërkohë një tjetër studim i Qëndresës Qytetare i kryer më 17 dhjetor nxjerr në pah të njëjtën situatë.
Sipas këtij studimi:
- 77.5% e studentëve e ndjekin mësimin online pa Laptop apo PC.
- Në mësim marrin pjesë vetëm 60% e studentëve
- Studentët vlerësojnë me noten 8 pedagogët dhe me 5-6 sekretaritë e Fakulteteve
- 6% e studentëve shpenzojnë 20 euro në muaj për internet
