Në laboratorët e Institutit të Shëndetit Publik mund të dallohen mutacionet e Covid-19, por nuk mund të përcaktohet se cili mutacion është.
Kështu sqaroi Shefja e Departamentit të Epidemiolgjisë në ISHP, Silva Bino, të mërkurën, në emisionin Open.
Ajo shpjegoi se:
“Në analizat e PCR që dalin, ka shenja që nuk është i njëjti virus si më parë, por nuk dimë të themi se cili është, a i Afrikës së Jugut apo ndonjë vendi tjetër.”
Bino shtoi se kanë qenë të paktën dy persona në Elbasan, të dyshuar për infektimin me një mutacion të Covid-19.
Ajo sqaroi se Shqipëria është pjesë e një rrjeti ndërkombëtar përmes së cilit dërgon mostrat e dyshuara në laboratorë të specializuar.
Më herët dhe Nëndrejtori i ISHP-së, Dritan Ulqinaku ka paralajmëruar se një mutacion i Covid-19 po qarkullon në vend, por nuk dihet ende se cili variant.
Në shumë vende në botë janë zbuluar disa mutacione të Covid-19, të cilat njihen si ‘varianti britanik’, ‘varianti brazialian’ apo ‘varianti i Afrikës së Jugut’.
Testimet paraprake kanë treguar se variantet e reja të koronavirusit janë më lehtë të transmetueshëm, mund të shkaktojnë më shpejt mbipopullimin e spitaleve dhe mund të jenë më vdekjeprurës.
