Charles Michel, kryeministri i Belgjikës dhe njëkohësisht kreu i Këshillit Europian akuzoi të martën Mbretërinë e Bashkuar për “shtetëzimin e vaksinave“, duke ndaluar eksportin e tyre.
BE është kritikuar nga disa shtete anëtare, të cilët kanë kërkuar të blejnë vaksina nga Rusia dhe Kina, duke parë fushatën e suksesshme të vaksinimit të Britanisë.
Austria dhe Danimarka thanë javën e kaluar se do të sigurojnë doza nga Izraeli.
Por në një nga postimet e tij të rregullta në blog, ish-kryeministri belg, i cili kryeson samitin e BE, mbrojti politikat e bllokut.
Michel tha se ishte “i tronditur” kur dëgjoi se BE-ja akuzohej për “shtetëzimin e vaksinave” pasi Italia bllokoi një dërgesë të destinuar për në Australi për në javën e kaluar.
“BE nuk ka ndaluar kurrë eksportin,” tha ai, duke akuzuar Britaninë dhe Shtetet e Bashkuara për ndalimin e eksportit të vaksinave dhe përbërësve të vaksinave.
“Por Bashkimi Evropian, rajoni me kapacitetin më të madh të prodhimit të vaksinave në botë, thjesht ka vendosur një sistem për kontrollimin e eksportit të dozave të prodhuara në BE,” ka shkruar Michel.
“Objektivi ynë: të parandalojmë kompanitë nga të cilat ne kemi porositur dhe parapaguar të eksportojnë dozat në vende të tjera të përparuara, kur ende nuk kanë dorëzuar atë që kanë premtuar.”
