Prokurorët e çështjes Tahiri-Habilaj, Besim Hajdarmataj dhe Vladimir Mara do të marrin sot në pyetje Moisi Habilaj, Nezar Seitin dhe Meridian Sulajn në Katania të Italisë.
Prokurorët do të pyesin tre anëtarët e bandës Habilaj, në lidhje me përfshirjen e ish-ministrit të Brendshëm Saimir Tahiri në trafikun ndërkombëtar të lëndëve narkotike, gjatë kohës që ai mbante postin e ministrit të Brendshëm.
Moisi Habilaj, kushuri i ish-ministrit Tahiri, dhe Meridian Sulaj u arrestuan në Katania më 16 tetor 2017, si drejtues të një bande që në vitet e fundit ka trafikuar në Itali më shumë se 3,5 ton kanabis, armë kallashnikov dhe qindra armatime.
Nga prokuroria e Katanias dolën të dhëna se në këtë çështje është përfshirë dhe Saimir Tahiri, ish-ministrër Brendshëm, që gjatë kohës që mbante këtë post ka favorizuar dhe lehtësuar trafikun e lëndëve narkotike për bandën Habilaj.
Tre ditë pas arrestimeve në Itali, Nezar Seiti u arrestua gjatë një aksioni të policisë shqiptare në Babicë të Vlorës, ku u kapën 4,5 tonë kanabis.
Megjithëse Seiti, i njohur ndryshe si financier i bandës Habilaj, u arrestua dhe po hetohej në Shqipëri, kryeprokurorja e Përkohshme Marku lejoi, në shkelje të nenin 419 të Kodit të Procedurës Penale, ekstradimin e tij në Itali.
Largimi nga vendi i një prej të arrestuarve dhe dëshmitarëve kyç është një ndër ndërhyrjet më të rënda që Arta Marku ka bërë në çështjen Tahiri-Habilaj, në favor të ish-ministrit Tahiri.
Më pas, Arta Marku shkarkoi Besim Hajdarmatajn nga detyra si Kryeprokuror i Krimeve të Rënda në Tiranë dhe e kaloi atë në postin e prokurorit të thjeshtë. Gjithsesi deri më tani, çështja Tahiri vazhdon ende të hetohet nga Zoti Hajdarmataj.
Me kërkesë të prokurorisë, ish-ministri Tahiri u vendos në arrest shtëpie më 12 maj, nën akuzën për “ Trafikimin e narkotikëve”, në bashkëpunim, në formën e grupit të strukturuar kriminal, e parashikuar në nenet 283/a dhe 333/a, në lidhje me nenin 28 të Kodit Penal dhe, “Korrupsioni pasiv i funksionarëve të lartë shtetërorë ose i të zgjedhurve vendorë”, e parashikuar në nenin 260 të Kodit Penal.
Vetëm dy ditë më parë, Gjykata e Apelit të Krimeve të Rënda, sërish në favor të Tahirit, hodhi poshtë kërkesën e porkurorisë për të ashpërsuar masën e sigurisë në “arrest me burg” dhe vendosi se Saimir Tahiri do të hetohet në liri.
