BE do të kthejë të gjithë azilkërkuesit që vijnë nga Ballkani Perëndimor, dhe do të pranojë vetëm ata që largohen nga vendet e luftës.
Lajmi u dha gjatë konferencës për shtyp në përfundimit të takimit dy ditor të 12 ministrave të brendshëm të BE-së dhe 6 përfaqësuesve të Ballkanit Perëndimor, nga Zëvendëspresidenti i KE-së Margaritis Schinas.
Shinas paralajmëroi vendet e Ballkanit Perëndimor të punojnë për të luftuar trafikimin e emigrantëve dhe azilkërkuesit e paligjshëm. Ai njoftoi se Zyra Evropiane për Azilantët (EASO), do të ndihmojë vendet e Ballkanit Perëndimor të rrisë kapacitetet pritëse për refugjatët.
Eurokomisioner Oliver Varhelyi i kërkoi vendeve të Ballkanit Perëndimor të marrin masa për të ndaluar këtë fenomen shqetësues për BE-në.
Ministri i Brendshëm austriak, Karl Nehammer tha se duhet më shumë bashkëpunim me vendet e Ballkanit për “të dyfishuar përpjekjet për të luftuar emigracionin e paligjshëm”.
Në qershor 2020, pas lehtësimit të masave anti Covid-19, Ballkani Perëndimor u bë rruga e preferuar e emigrantëve të paligjshëm, për të kaluar në vendet e BE-së. Sipas raportit të publikuar nga Frontex, në qershor u kapën 2050 emigrantë të paligjshëm, ose 70 përqind më shumë se në maj dhe tre herë më shumë krahasuar me një vit më parë.
Në gjysmën e parë të 2020-ës, gati 9300 emigrantë të paligjshëm u kapën duke kaluar ilegalisht kufirin për në vendet e BE-së, përmes Ballkanit Perëndimor — 73 përqind më shumë se në 6 muajt e parë të 2019-ës.
