Presidenti i Shteteve të Bashkuara të Amerikës, Joe Biden përmes një letre ka uruar presidenten e Kosovës, Vjosa Osmanin për zgjedhjen në postin e presidentes.
Në letrën e publikuar nga Presidenca e Kosovës, Biden premtoi të ndihmojë Kosovën në sigurimin e vaksinave antiCovid.
Biden shkruan se SHBA-të financuan me 4 miliardë dollar programin COVAX, përmes të cilit Kosova ka marr dozat e para të vaksinave dhe po shikon mundësinë për furnizime direkte.
“Me rritjen e furnizimit të vaksinave në SHBA, po shikojmë alternativa për të punuar me aleatët tanë për të ndarë çfarë të kemi mundësi,”
Sikurse Sekretari amerikan i Shtetit më parë, Biden thekson se SHBA-të do të ndihmojnë përpjekjet për një marrëveshje paqje me Serbinë, bazuar në njohjen e ndërsjelltë.
“SHBA-të do të vazhdojnë të mbështesin përpjekjet për sigurimin e paqes së qëndrueshme dhe dialogut produktiv ndërmjet Kosovës dhe Serbisë,” shkruhet mes të tjerash në letër.
Biden nënvizon se normalizimi i marrëdhënieve me Serbinë do të kërkojë kompromise, por është i rëndësishëm për të ardhmen euro-atlantike të vendit.
Presidenti amerikan u shpreh se familja e tij ka një lidhje sentimentale me Kosovën, për shkak se i biri Beau, shërbeu vite më parë me forcat paqeruajtëse në vend.
Biden i ofroi Osmanit mbështetjen e SHBA-ve në punën për prioritetet e përbashkëta.
