“Dialogu Serbi-Kosovë nuk do të jetë i lehtë. Por ky proces dhe ky angazhim i sinqertë nga të dy palët është i domosdoshëm për të mirën e njerëzve të Kosovës dhe Serbisë”, u shpreh Përfaqësuesi i lartë i BE-së Joseph Borrell, në një reagim para nisjes së dialogut, të martën, në Bruksel.
“Dialogu dhe rezultati i dialogut është rruga drejt së ardhmes evropiane të të dy palëve. Dhe ndërkohë, ajo tashmë ka sjellë rezultate të rëndësishme për qytetarët e tyre.
Më lejoni të jap disa shembuj: integrimi i policisë dhe gjyqësorit në veri të Kosovës në sistemin e Kosovës, mbledhja e të ardhurave doganore nga tregtia me Serbinë, ose pjesëmarrja si anëtare e plotë në organizata dhe iniciativa të ndryshme rajonale”, shtoi Borrell.
Ai u shpreh se BE kërkon një “marrëveshje gjithëpërfshirëse ligjërisht të detyrueshme për normalizimin e marrëdhënieve midis Kosovës dhe Serbisë, dhe për ta bërë të ardhmen evropiane një realitet”. Borrell e shtyu Ballkanin Perëndimor të “shfrytëzojë këtë mundësi që po i jep BE”.
“Marrëdhëniet ndërmjet të dyve, Kosovës dhe Serbisë, janë shumë të rëndësishme për stabilitetin e të gjithë rajonit, për stabilitetin afatgjatë, për progresin ekonomik. Pa një marrëveshje midis Kosovës dhe Serbisë, ajo do të rrezikohet”, përfundoi Borrell.
