Gjykata e Apelit lë në burg ish-kryebashkiakun Kajmaku

Gjykata e Apelit lë në burg ish-kryebashkiakun Kajmaku

Gjykata e Apelit ka lënë në fuqi vendimin e Gjykatës së Krimeve të Rënda për masën e arrestit me burg, në mungesë, ndaj  ish-kryebashkiakut të Vorës Kajmaku.

Më 12 nëntor, Gjykata e Krimeve të Rënda vendosi masën e sigurisë arrest me burg për Kajmakun me akuzën e mashtrimin në formularin e dekriminalizimit. Kajmaku e apeloi këtë vendim më 16 nëntor.

Prokuroria kërkoi arrestimin e ish-kryebashkiakut të Vorës Kajmaku, për shkak të fshehjes së të shkuarës së tij në formularët e dekriminalizimit.

Më 1 nëntor Komisioni Qëndror i Zgjedhjeve shkarkoi nga detyra Zotin Kajmaku, pasi ai nuk kishte deklaruar arrestimin dhe hetimin në Greqi për përdorim parash të falsifikuar, nën identitetin e rremë Jorgo Toto.

Pas denoncimit të Partisë Demokratike, faktet e mësipërme u vërtetuan nga prokuroria, nëpërmjet shenjave të gishtave.

Sipas ligjit të dekriminalizimit, kush gënjen në formularin e dekriminalizimit shkarkohet nga funksioni publik dhe dënohet me burg nga 6 muaj deri në 4 vjet.

Që prej muajit gusht PD ka denoncuar fshehjen e së shkuarës së kryebashkiakut Agim Kajmaku. Ky i fundit ka mohuar të jetë arrestuar, apo hetuar.

Përveç Kajmakut, demokratët kanë akuzuar edhe dy socialistë të tjerë, kryebashkiakun e Vaut të Dejës, Mark Babani dhe kandidatin për Shkodrën, Valdin Pjetri, ky i fundit u tërhoq nga marrja e mandatit pasi akuzat u vërtetuan.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>