Kosova do të respektojë marrëveshje e Asociacionit të komunave me shumicë serbe, të firmosur në vitin 2015.
“Ne kemi nënshkruar marrëveshje në vitin 2015 për këtë Asociacion dhe[..]ne do ta respektojmë plotësisht atë, por jemi pajtuar që të punojmë së bashku që të arrijmë një marrëveshje ligjërisht obliguese me Serbinë, ku përfshihet edhe Asociacioni dhe çështje tjera”, tha Kryeministri i Kosovës, Avdullah Hoti të enjten gjatë një debati në Komitetin për Punë të Jashtme në Parlamentin Evropian (PE), raportoi Radio Evropa e Lirë (RFL).
Në tetor të vitit 2015, kjo marrëveshje u dërgua për interpretim në Gjykatën Kushtetuese të Kosovës nga presidentja e atëhershme e Kosovës, Atifete Jahjaga.
Gjykata Kushtetuese, në vendimin e nxjerrë në dhjetor të vitit 2015, tha se Marrëveshja për Asociacionin në 23 pika të saj, nuk është në harmoni me Kushtetutën e Kosovës.
Gjykata kishte konstatuar që Asociacioni i komunave me shumice serbe do të themelohet, siç ishte paraparë me Marrëveshjen e parë të Brukselit (të vitit 2013), të ratifikuar nga Kuvendi i Kosovës dhe të shpallur nga presidentja e Republikës së Kosovës (v.j. Atifete Jahjaga), kurse Marrëveshja mbi parimet (për themelimin e Asociacionit, e arritur më 2015), nuk është tërësisht në përputhje me frymën e Kushtetutës.
Gjykata Kushtetuese kishte konstatuar që akti juridik i Qeverisë së Republikës së Kosovës dhe statuti që implementon parimet, për të qenë në pajtueshmëri me frymën e Kushtetutës, duhet të plotësojë standardet kushtetuese.
Marrëveshja parashikon bashkimin e komunave me shumicë serbe në Kosovë në një shoqatë vetëqeverisëse.
Publikuar nga Radio Evropa e Lirë/Përshtatur nga Exit News
