Kosova përkujtoi mbi 80 viktimat e masakruara 22 vjet më parë në fshatin Lypeniq të Pejës.
Ushtruesi i Detyrës së Presidentit të Kosovës, Glauk Konjufca tha se institucionet shtetërore nuk duhet të pushojnë së punuari derisa të vendoset drejtësia në vend për krimet dhe masakrat e kryera nga regjimi serb në Kosovë.
“Ky fshat përjetoi tre masakra gjatë luftës. Mbi 80 civilë të paarmatosur janë vrarë mizorisht nga forcat serbe. Është detyra jonë, si institucione të Kosovës, të mos pushojmë kurrë së kërkuari drejtësi, që gjenocidi serb të ndëshkohet dhe kriminelët të mos ecin të lirë siç ndodh në shumë qytete të Serbisë”, tha Konjufca pas përkujtimit në varret e viktimave .
Konjufca tha se asgjë nuk është bërë në drejtim të dënimit të atyre që bënë këto masakra në Kosovë. “Plagët janë ende të hapura sepse ka ende njerëz të zhdukur dhe ky është një krim i dyfishtë i kryer nga Serbia,” shtoi ai.
Nënkryetarja e Parlamentit, Saranda Bogujevci, e cila vetë imbijetoi një masakre dhe humbi familjen e saj, tha se masakra e Lybeniq dhe vendeve të tjera tregojnë krimet që Serbia bëri në Kosovë.
“Ne duhet të punojmë që drejtësia të vendosë vendin e saj. Nuk është një proces i lehtë por puna duhet të bëhet, të paktën që këto familje të lehtësohen kur të ketë drejtësi, ”tha Bogujevci.
“Ata duhet ta dinë që të afërmit e tyre nuk vdiqën për asgjë, gjaku i tyre u derdh për liri, por edhe për të vendosur drejtësi,” shtoi ajo.
Forcat serbe intensifikuan sulmet e tyre kundër civilëve shqiptarë të Kosovës sidomos pas 24 marsit 1999 kur filluan bombardimet e NATO-s kundër bazave ushtarake serbe, duke kryer disa masakra në të gjithë vendin
