Kosovë, mesazhet e fundit të partive politike para zgjedhjeve

Nga Exit News
Kosovë, mesazhet e fundit të partive politike para zgjedhjeve

Pak orë para heshtjes zgjedhore partitë politike në Kosovë kanë dhënë mesazhet e tyre të fundit për zgjedhjet e 14 shkurtit.

E premtja ishte dita e fundit e fushatës zgjedhore dhe partitë e shfrytëzuan për të thënë fjalët e tyre të fundit.

Exit News sjell më poshtë një përmbledhje të mesazheve të partive kryesore në Kosovë:

Lidhja Demokratike e Kosovës (LDK)

Mesazhi i fundit i LDK para zgjedhjeve ishte se kjo parti “ka kulturë demokratike për të respektuar institucionet shtetërore dhe publike e për t’i fuqizuar ato”.

Kryeministri Hoti ftoi qytetarët ta krahasojnë punën e qeverisë së tij me qeverisjet e kaluara dhe shtoi se nën drejtimin e tij, “Kosova u kthye në krye të agjendës amerikane për Ballkanin”

Partia Demokratike e Kosovës (PDK)

Kandidati për kryeministër i PDK, Enver Hoxhaj premtoi fitore.

Në tubimin e fundit ai deklaroi se arrestimi i figurave kryesore të partisë, Hashim Thaçi e Kadri Veseli, nuk e ka ulur popullaritetin e PDK-së por “është kthyer në mbështetje të re politike”.

Hoxhaj shtoi se programi i partisë së tij është i qartë dhe kritikoi punën e qeverisë Hoti për sigurimin e vaksinës COVID-19.

Lëvizja Vetëvendosje (LVV)

Kandidati për kryeministër i Lëvizjes Vetëvendosje Albin Kurti në tubimin e fundit të mbajtur në Prishtinë, u bëri thirrje qytetarëve të votojnë masivisht.

Ai tha se  Lëvizja Vetëvendosje dhe Lista Vjosa “janë bashkuar kundër korrupsionit, prapambetjes dhe kapjes së shtetit”.

Kurti u shpreh se synon një shumicë të tillë që të mund të formojë i vetëm qeverinë.

LEXO  100 milionë euro kanë dërguar emigrantët kosovar vetëm për muajin maj

Vjosa Osmani u shpreh se më 14 shkurt, do të vuloset “pensionimi politik, i atyre që kanë kapur shtetin dhe kanë dëmtuar çdo qelizë të tij”.

Nisma Socialdemokrate

Nisma e përmbylli fushatën në Prizren ku ka kërkuar mbështetje për kauzën “në mbrojtje të vlerave njerëzore dhe kombëtare”.

Kandidati për kryeministër i Nismës, Fatmir Limaj, i bëri thirrje qytetarëve që të votojnë për të.

“Ju ftojmë hajde të rreshtohemi si në vitin 98-99. Ashtu siç po rreshtohen bashkëluftëtaret tanë nga anët tjera të Kosovës. Luftëtarët janë ngritë në këmbë që zëri i çlirimtarëve të dëgjohet fort në Parlamentin e Kosovës”, tha Limaj në ditën e fundit të fushatës.

Aleanca për Ardhmërinë e Kosovës (AAK)

Në përmbyllje të fushatës së Aleancës për Ardhmërinë e Kosovës, kreu i saj, Ramush Haradinaj, tha se vota për AAK-në dhe për të si president “është votë që të kryhen punët e Kosovës duke mos e pyetur Serbinë”.

Haradinaj përsëriti premtimin se nëse Kosova nuk anëtarësohet në NATO dhe Bashkim Evropian deri në vitin 2025, do të bashkohet me Shqipërinë.

“Agjenda kryesore në qeverinë e ardhshme është zhvillimi ekonomik”, tha Haradinaj.

Kosova mban të dielën zgjedhjet e parakohshme parlamentare. Gjatë ditës së shtunë vendi hyn në heshtjen elektorale ku ndalohet propaganda dhe mesazhet e partive politike.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>