Komisioni i Pavarur i Kualifikimit shkarkoi nga detyra prokurorin Adnand Xhelili për shkak të problemeve me justifikimin e pasurisë.
Mediat raportojnë se problem për prokurorin rezultoi një apartament me sipërfaqe 117 metra katrorë në Tiranë dhe një vilë trekatëshe në Borsh të Sarandës.
Apartamentin Xhelili ishte shprehur se e kishte blerë si i pastrehë nga Enti i Banesave në vlerën 1.1 milion lekë dhe se e ka shlyer për 10 vite në periudhën 1999-2005. Në vitin 2003 Xhelili kishte deklaruar se e kishte shlyer me kredi, ndërkohë që në deklaratën e vetingut ai kishte deklaruar si burim kursimet familjare. Mospërputhje në deklarata është konstatuar edhe për vlerën.
Xhelili ishte prokuror në Prokurorinë e Tiranës prej më shumë se një dhjetëvjeçari. Paralelisht me detyrën si prokuror, është angazhuar edhe si pedagog në një universitet privat.
