Kreu i Lidhjes Demokratike të Kosovës, Lumir Abdixhiku bëri thirrje të shtunën për unitet përballë krizës në kufirin verior që po përballet Kosova, pas sulmeve në pikat e konstrollit të automjeteve në Zubin Potok e Zvecan.
“Gjendja e tensionuar në Veri kërkon unitet të plotë,” shkruan Abdixhiku në rrjetin Facebook, ndërkohë që i kërkon qeverisë kosovare të mbledh gjithë spektrin politik në vend në mënyrë “që të shfrytëzojmë të gjitha kapacitetet tona, vendore e të jashtme, për të mbrojtur interesat tona shtetërore sot.”
Abdixhiku shkruan se partia që përfaqëson ka qënë në kontakt të vazhdueshëm me qeverinë për të ditur planet mbi menaxhimin e situarës dhe ka shprehur gatishmërinë për të ndihmuar.
Ai i bëri thirrje komunitetit ndërkombëtar që të ndihmojnë Kosovën nga kërcënimet e Serbisë dhe tensioni i situarës në veri të vendit.
Rreth orës 1 të mëngjesit të së shtunës, një qendër e regjistrimit të automjeteve u dogj në Zubin Potok dhe granata u hodhën në një qendër tjetër në Zveçan, dy qytetet në veri të Kosovës.
Prishtina e akuzon Beogradin se kërkon të krijojë perceptimin publik mbi një konflikt mes komunitetit serb dhe forcave kosovare të rendit në kufirin verior.
Në mediat serbe nga ana tjetër nuk u publikua asgjë mbi incidentin, por ato kanë botuar lajme të pambështetura se si policia e Kosovës ka dhunuar 3 serbë. Disa raportime thonë se ata u dhunuan për vendosjen e baneërave ” Mirë se erdhët në Asociacionin e Komunave serbe” dhe të tjera se janë rrahur në pikat kufitare.
