330 mijë shqiptarë janë larguar nga vendi gjatë 7 viteve të fundit.
Revista Monitor ka publikuar të dhënat e INSTAT për emigrimin nga viti 2011 deri në vitin 2017.
Shqiptarët e larguar përbëjnë një popullsi më të madhe se popullsia aktuale e Fieri, qarkut të dytë më të madh në vend, i cili ka 302 mijë banorë.
Sipas të dhënave, numri më i lartë i shqiptarëve të emigruar është në vitin 2011 me 52 mijë persona. Në vitin 2017 kjo shifër ishte 40 mijë persona.
INSTAT thekson se pavarësisht se në vitet e fundit, është vënë re një tendecë për tu kthyer e shqiptarëve që prej vitesh kanë jetuar jashtë, sërish numri i atyre që largohen është më i lartë.
Numri i lartë i shqiptarëve është bërë shqetësim dhe për Bashkimin Europian.
Sot, BE nënshkroi me Shqipërinë, përmes Komisionerit Avramopoulos, një marrëveshje për ruajtjen e kufijve të BE-së nga emigrantët e paligjshëm dhe krimi i organizuar shqiptar.
Komisioneri Avramopoulos foli për “nevojën për të ulur numrin e atyre që abuzojnë me liberalizimin e vizave, pasi të gjithë duam të vazhdojmë ta kemi atë.”
Holanda dhe Franca shpeshherë kanë përmendur kthimin e regjimit të vizave për Shqipërinë si të vetmen mundësi për të ndalur fluksin e madh të emigrantëve shqiptarë dhe kriminalitetit në rritje.
Ligjërisht ekziston mundësia që këto shtete të kërkojnë nga Komisioni Evropian pezullimin e liberalizimit të viave për Shqipërinë.
Mekanizmi i pezullimit për marrëveshjet e liberalizimit të vizave, duke përfshirë atë me Shqipërinë, rregullohet përmes Rregullores së BE-së 1289/2013. Sipas kësaj rregulloreje, përjashtimi nga regjimi i vizave për një vend të tretë mund të pezullohet përkohësisht kur kemi të bëjmë me “një situatë emergjence”. Një situatë e tillë mund të ndodhë për shkak të rritjes së papritur të emigrantëve të parregullt, kërkesave për azil apo kërkesave të refuzuara për ripranim.
