Partia Demokratike ka kërkuar sot dorëheqjen e Krytarit të Kuvendit Gramoz Ruçi, pasi në seancën e 18 dhjetorit në shkelje të kushtetutës, ka lejuar zgjedhjen e kryeprokurores së Përkohshme.
Me anë të një deklarate për shtyp, kreu i grupit parlamentar të PD Edmond Spaho theksoi se në seancën e fundit parlamentare, Edi Rama, me miratimin dhe zbatimin e Gramoz Ruçit “kanë kryer puç kushtetues” duke lejuar votimin për Prokurorin e Përkohshëm të Përgjithshëm megjithëse Kushtetuta parashikon zgjedhjen me 3/5 e votave, për kandidatët e propozuar nga KLP dhe që kanë kaluar vettingun.
Ndër të tjera, deputeti Spaho sqaroi se zgjedhja e kryeprokurores i jep mbrojtje politike dhe antiligjore Kryeministrit Rama, ministrave dhe miqve të tij oligarkë.
“Në këto kushte opozita nuk mund të lejojë shkeljen permanente të Kushtetutës dhe delegjitimimin e institucioneve duke qëndruar fort në mbrojtje të saj dhe institucioneve demokratike dhe si hap i parë i kthimit në normalitet në Kuvend, kërkojmë dorëheqjen e Gramoz Ruçit nga funksioni i Kryetarit të Kuvendit”, mbylli deklaratën Zoti Spaho.
