Kryeministri Edi Rama sulmoi opozitën duke e quajtur të papërgjegjshme për grumbullimin e njerëzve në takime.
Gjatë një takimi në Rrogozhinë, Rama u shpreh se opozita përfaqëson antishtetin e rrumpallën.
“Ata s’duan që t’ja dinë as për njerëzit e tyre. Janë aty me gishta, me flamuj, me ulërima. Ku kanë gjetur shesh bëjnë përshesh. Dy-tre javë do virusi që të zhvillohet dhe të kapi fytin. Unë uroj që asnjë prej tyre mos të përfundojë në spital e jo më të ndërroj jetë.” u shpreh ai.
Rama deklaroi se gjatë qeverisjes së tij ka dyfishuar tokën që punohet dhe ka ulur importin e mallrave drejt vendit.
“ Deri para 7 vitesh e kusur Shqipëria importonte 7 dhe eksportonte 1. Sot Shqipëria importon vetëm 3 dhe eksporton 1. Që do të thotë se rënia e importit të prodhimeve bujqësore lidhet me rritjen e prodhimit në vend.”, tha ai.
Ai shtoi se Shqipëria është e para për thithjen e fondeve nga BE.
“Kemi krijuar një agjenci europiane, atje me një mike tonën, që ka bërë skuadër fantastike për të ndihmuar fermerët”, tha Rama.
