Në Gjermani, një nga vendet më të prekura në Evropë nga koronavirusi, po vdesin më pak njerëz se në vendet e tjera të Evropës.
Gjermania kishte, të hënën në mëngjes vetëm 93 vdekje nga rreth 23 921 të infektuar, kurse Italia kishte 59 138 të infektur dhe 5 476 të vdekur.
Niveli i vdekshmërisë në Gjermani është rreth 0,39 për qind, në kontrast dramatik me Italinë ku vdekshmëria është thuajse 10 për qind.
Ky sukses i Gjermanisë, sipas studiuesve gjermanë, i kushtohet të paktën tre arsyeve kryesore.
Kapacitetet e sistemit shëndetësor
Gjermani ka 25 mijë shtretër të terapisë intensive, me pajisje për frymëmarrje të kontrolluar.
Kjo shifër është 5 herë më e madhe se Italia dhe Mbretëria e Bashkuar, me 5 mijë shtretër secila, dhe 3,5 herë më e madhe se Franca,me 7 mijë shtretër.
Qeveria gjermane ka thënë se do ta dyfishojë numrin e shtretërve. Ajo po përgatitet që hotelet dhe sallat e mëdha publike t’i kthejë në ambiente për kurimin e pacientëve me simptoma të lehta.
Nga përvoja e deritanishme, terapia intensive ka shumë efikasitet në shpëtimin e pacientëve me gjendje të rënduar.
Testimi i hershëm
Gjermania ishte ndër vendet e para në botë që prodhoi testin dhe nisi diagnostikimin e menjëhershëm.
Laboratorët e pavarur filluan testimet në janar, kur shifrat e infeksionit ishin ende të ulta.
Këta laboratorë, me kalimin e muajve, e rritën kapacitetin e tyre dhe tani mund të diagnostikojnë 12 mijë persona në ditë.
Të testohesh në Gjermani është më e thjeshtë se në vendet e tjera. Mund të testohet kushdo që shfaq simptoma, vjen nga një zonë me rrezik ose ka pasur kontakt me një person të sëmurë.
Testimi i hershëm mundëson identifikimin dhe izolimin ose trajtimin në kohë të njerëzve të sëmurë, duke rritur mundësinë e shërimit dhe ulur mundësinë e infektimit.
Mosha e re e të infektuarve
70 për qind e të infektuarve me koronavirus në Gjermani janë të moshës nga 20 deri në 50 vjeç.
Sipas një raporti të Insitutit Robert Koch mosha mesatare e të infektuarve është 47 vjeç.
Në këto mosha vdekshmëria është më e ulët se në moshat e mëdha.
Ndërsa Italia, e cila ka popullsinë e dytë më të plakur në botë, mosha mesatare e të infektuarve është 63 vjeç dhe shumica dërrmuese e viktimave janë mbi 60 vjeç.
