42 raste të testuara, Shqipëria mbetet e paprekur nga koronavirusi

Nga Exit News
42 raste të testuara, Shqipëria mbetet e paprekur nga koronavirusi

“Shqipëria mbetet e paprekur nga koronavirusi” kështu theksoi sot Ministrja e Shëndetësisë Ogerta Manastirliu, e cila njoftoi se edhe 6 raste të dyshuara që u analizuan të martën rezultuan të painfektuar.

Gjatë mbledhjes së sotme të Task-Forcës së ngritur nga Ministria, Manastirliu pohoi se “deri më sot nuk kemi asnjë rast të konfirmuar me koronavirusin e ri”.

Prej datës 21 shkurt, kur virusi u pikas në Itali duke vënë në alarm të gjitha vendet e BE-së, Shqipëria ka kryer 42 testime, nga të cilat Ministria e Shëndetësisë thotë se nuk ka rezultuar asnjë person i infektuar.

Në Itali, pas të martës, numri i të vdekurve shkoi në 79 duke u shtuar me 27 brenda 24 orëve, ndërsa i të prekurve i kaloi 2 500 rastet. Megjithatë në Shqipëri autoritetet sigurojnë se virusi nuk është përhapur në vendin tonë.

Në një deklaratë për mediat, Manastirliu u shpreh se:

“Shqipëria deri më tani nuk ka rast të konfirmuar me koronavirusin e ri edhe pse në vende fqinjë kemi konfirmime të rasteve të reja, Maqedonia ka një rast të izoluar, kurse Kosova, Mali, i Zi, Serbia, Turqia, ende nuk kanë raste të konfirmuar”.

Najada Çomo, shefe e spitalit Infektiv në QSUT u shpreh gjatë raportimit në Task-Forcë se, “në spitalin infektiv nuk ka asnjë rast të rëndë qoftë nga gripi apo rastet e dyshuara nga koronavirusi”.

Ministria e Shëndetësisë ka kërkuar masa shtesë për higjienën në shkolla dhe në shërbimin e aviacionit civil apo dhe linjat urbane. Në mbledhjen e sotme të Task-Forcës ishte i pranishëm edhe drejtori i OBSh në Shqipëri, Raul Gonzales, i cili bëri thirrje që qytetarë t’u besojnë institucioneve.

Të martën Ministria tregoi se ditët e fundit ka pasur një bum telefonatash në drejtim të numrit të urgjencës. Vetëm nga e hëna në të martë u tha se ishin kryer 1 650 telefonata në numrin 127 .

Ministria e Shëndetësisë dhe Mbrojtjes Sociale përsërit se të gjithë ata, të cilët vijnë nga rajonet e prekura dhe që kanë patur kontakte me persona të sëmurë apo të dyshuar për koronavirus, të vetëkarantinohen për një periudhë 14 ditore.

Në rast se ndjejnë simptoma të cilat ngjallin dyshime për infektim nga koronavirusi udhëzohen që të njoftojnë urgjencën.

Javën e shkuar, Organizata Botërore e Shëndetësisë e klasifikoi rrezikshmërinë e përhapjes së koronavirusit në botë në nivel më të lartë.

Për tu informuar më tepër rreth koronavirusit mund të lexoni:

Koronavirusi – shtrirja dhe vdekjet e deritanishme (kliko këtu)

Kur duhet të shqetësohemi për koronavirusin (kliko këtu)

9 pyetjet më të shpeshta rreth koronavirusit (kliko këtu)

Masa më e efektshme për parandalimin e prekjes nga koronavirusi (kliko këtu)

Adresa juaj e emailit nuk do bëhet publike.

Lajme te ngjashme