9 persona nën hetim për sulmin ndaj policisë dhe punonjësve të IKMT te Unaza e Re

Nga Gerard Gega
9 persona nën hetim për sulmin ndaj policisë dhe punonjësve të IKMT te Unaza e Re

Policia njoftoi sot se kishte arrestuar 1 person dhe kishte shpallur në kërkim 8 të tjerë për sulmet që u bënë në “Unazën e Re” ndaj policisë dhe punonjësve të Inspektoriatit Kombëtar të Mbrojtjes së Territorit (IKMT) ditën e enjte.

Paraditen e së enjtes IKMT njoftoi se një punonjës i saj ishte lënduar rëndë “me fraktura në kokë dhe duar”. IKMT dënoi sulmin dhe tha se “ishte kryer nga banorë të zonës për shkak të detyrës”.

Ngjarja mbeti e paqartë, por rreth 24 orë më vonë, policia raportoi zyrtarisht duke thënë se të lënduar kishin qenë “4 punonjës të IKMT dhe 1 i policisë”. Sipas njoftimit zyrtar:

“[…] rreth orës 10:45, një grup personash, në bashkëpunim me njëri-tjetrin kanë goditur me gurë e sende të forta punonjësit e IKMT-së dhe punonjësit e Policisë, të cilët ishin duke bërë njoftimin e bizneseve që preken nga projekti i rrugës (së Unazës së Re). Si pasojë e sulmit […] mbetën të plagosur 4 punonjës të IKMT-së dhe 1 punonjës i Policisë […] dhe është dëmtuar edhe një automjet i Policisë.”

Për ngjarjen policia tha se kishte arrestuar “në flagrancë” një person (Sh.S. 50 vjeç) dhe kishte shpallur në kërkim 8 të tjerë (J.M.; S.H.; F.D.; V.D.; L.K.; Sh.N.; G.S dhe E.D.).

Prej më shumë se një viti banorë të zonës së “Unazës së Re” kundërshtojnë projektet e zgjerimit të rrugës pasi gjurma e projekteve prek banesat dhe bizneset e tyre. Qeveria ka përjashtuar dëmshpërblimet, pasi një pjesë e ndërtimeve nuk janë legalizuar.

Protestat e vazhdueshme të banorëve janë shoqëruar shpesh me përplasje me policinë dhe me arrestime.

Situata aktualisht po përshkallëzohet pasi qeveria mbylli çështjen e tenderave dhe ka nisur të dëmshpërblejë vetëm banorët që kanë pasur ndërtime me dokumentacion të rregullt. Më 6 nëntor në media u njoftua dëmshpërblimi për 8 familje.

Megjithëse fondet për zgjerimin e Unazës së Re shkojnë mbi 35 milionë euro, qeveria nuk ka parashikuar dëmshpërblimin e të gjithë banorëve që preken nga projektet. Kompania Salillari do të ndërtojë 2 nga 3 segmentet e rrugës për rreth 27 milionë euro, segmenti i tretë do të ndërtohet nga Viktoria Invest për 9,4 milionë euro.

Lajme te ngjashme

Më të lexuarat

Dërgo informacion në mënyrë konfidenciale

Nëse keni informacion në interes të publikut mund ta dërgoni te redaksia e Exit duke zgjedhur te mbeteni anonim nëse dëshironi.

Mënyrat e dërgimit >>