Sekretari i Përgjithshëm i NATO-s Jens Stoltenberg hodhi poshtë deklaratat e presidentit serb Aleksandër Vuçiç për largimin e KFOR-it nga Kosova.
“KFOR siguron një mjedis të sigurt dhe garanton lirinë e lëvizjes për të mirën e të gjitha komuniteteve në Kosovë, bazuar në mandatin tonë të Këshillit të Sigurimit të Kombeve të Bashkuara. Aleatët e NATO-s janë të vendosur për KFOR-in dhe për misionin e tij të rëndësishëm”, u shpreh Stoltenberg gjatë takimit me Presidentin Aleksandër Vuçiç në selinë e NATO-s, sipas njoftimit për media.
Stoltenberg u shpreh se NATO mbështet dialogun mes Beogradit dhe Prishtinës:
“Dialogu konstruktiv është thelbësor për stabilitetin në këtë rajon dhe unë vazhdoj t’u bëj thirrje të gjitha palëve që të përfshihen në dialog”.
Ai u shpreh gjithashtu se Serbia mund të zgjedhë nëse do te jetë ose jo anëtare e NATO-s, por theksoi se “partneriteti me NATO-n mund të sjellë përfitime të vërteta për Serbinë”.
