Ambasadori amerikan Donald Lu ka “bojkotuar” sërish sot kryetarin e Kuvendit Gramoz Ruçin.
Pas mungesës në seancën e ditës së shtunë kur Zoti Ruçi u zgjodh kryetar Kuvendi, në seancën e sotme Ambasadori Lu hoqi kufjet, nga ku dëgjohen fjalimet e përkthyera, në momentin që Zoti Ruçi mori fjalën, pas fjalimit të Kryeministrit Rama.
Kamerat e televizionit News 24 kanë fiksuar momentin kur ambasadori heq kufjet.
I pyetur nga gazetarët, gjatë pushimit të seancës, Zoti Lu nuk e ka mohuar veprimin e tij, por ka preferuar të mos e komentojë atë, duke u shprehur: “Nuk mund t’i përgjigjem kësaj pyetjeje.”
Mungesa e përfaqësuesve të ambasadës amerikane në konstituimin e Kuvendit të ri të vendit ishte një gjest që ndodhi për herë të parë më 9 shtator.
Megjithëse Ambasada Amerikane nuk ka dhënë asnjë shpjegim, duket se bojkoti është kundrejt kryetarit të Kuvendit Gramoz Ruçi.
Sipas disa dokumenteve të Ambasadës Amerikane të vitit 2009, publikuar nga Wikileaks:
“Ruçi ka lidhje të hershme me narko-trafikantë dhe bandat e krimit të organizuar. Ruçit gjithashtu i është ndaluar hyrja, në mënyrë të përhershme, në Shtetet e Bashkuara të Amerikës që prej vitit 2005.”
Nuk ka asnjë dyshim se Kryeministri Edi Rama ka qënë i informuar për këtë fakt përpara se ta propozonte Gramoz Ruçin për kryetarin e ri të Kuvendit.
Por, Kryeministri i injoroi dhe po vazhdon t’i injorojë këto shqetësime legjitime si të opozitës dhe të përfaqësive të huaja duke i thurrur lavde Gramoz Ruçit si figurë e madhe politike.
