Kreu i Partisë Demokratike, Lulzim Basha i shikon kritikat e kryeministrit Rama ndaj BE-së si ikje nga përgjegjësia e qeverisë së tij të cilën kryedemokrati e quan më të keqen “në historinë e Shqipërisë”.
Rama deklaroi në Kuved të hënën se Bashkimi Europian “nuk pa përtej kufijve të vetvetes” në lidhje me procesin e shpërndarjes së vaksinave, por Basha thotë se “BE ka qenë dhe është pranë nesh në ditë të mira e të vështira”.
Në reagimin e tij në rrjetet sociale, kreu i opozitës e krahason kryeministrin me Tiren, sanitaren e spitalit COVID2 që u arrestua pasi u zbulua se kishte marrë ryshfet duke u hequr si infermiere.
Shqipëria është në gjendje të rëndë sipas Bashës ndërsa Rama sulmon BE-në.
“Për 8 vjet mashtrime, dështime, vjedhje, varfëri fajin nuk e ka BE-ja, fajin e ka Tirja i qeverisë që i vjedh shqiptarët dhe u mohon edhe bukën e fëmijëve. Edhe një herë Rama fajëson të tjerët për qeverinë më të keqe në historinë e Shqipërisë. BE ka qenë dhe është pranë nesh në ditë të mira e të vështira. Mirënjohja e shqiptarëve nuk do të mungojë kurrë. Pas 25 prillit ne do ta rikthejmë Shqipërinë në rrugën e duhur drejt destinacionit tonë të vetëm që është integrimi në BE.”
