Bashkia Tiranë do t’i japë 682 metra katorë tokë publike në Rrugën e Kavajës kompanisë private ‘Star Tek’, kompania që ndërtoi këndin e lojërave në Parkun e Liqenit, për të ndërtuar godinë banimi dhe shërbimesh.
Kalimi i pronës publike në pronësi të kompanisë ‘Star Tek’ do të miratohet nga Këshilli Bashkiak në mbledhjen e radhës.
Kompania ‘Star Tek’ do të ndërtojë një godinë banimi dhe shërbimesh me sipërfaqe 862 metra katrorë, nga të cilat 682 metra katrorë do t’i përfitojë nga marrëveshja me Bashkinë Tiranë, ndërsa 180 metra katrorë do t’ja u blejë pronarëve të tokës.
Sipas marrëveshjes, Bashkia Tiranë do të përfitojë 40 për qind të ambienteve nga kjo godinë, të cilat mund t’i përdorë për kopshte, çerdhe dhe ambiente për strehim social.
Rruga e Kavajës është një prej rrugëve më kryesore të Tiranës, ku çmimet e apartamenteve dhe ambienteve për shërbim vijojnë nga 1400 euro për metër katrorë. Megjithëse ende nuk dihet se sa katëshe do të jetë godina, pasi të dhënat e projektit nuk janë bërë publike, kompania private, falë Bashkisë Tiranë, do të gëzojë një pronë që vlen miliona euro, në shkëmbim të ndërtimit të disa ambienteve për bashkinë.
Kompania ‘Star Tek’ është themeluar në vitin 2012 nga Lulëzim Mehmetaj dhe ka ndërtuar këndin e lojërave në Parkun e Liqenit, projekt i Bashkisë Tiranë, i zhvilluar në shkelje të ligjit dhe i shumë kundërshtuar nga qytetarët.
Pak ditë më parë, u bë publike një tjetër kontratë mes Bashkisë Tiranë dhe kompanisë Salillari, sipas së cilës bashkia i jep një truall prej 85 mijë metra katrorë kompanisë për ndërtimin dhe menaxhimin e terminalit të transportit publik në Tiranë për 33 vjet. Kompania do të ndërtojë dhe ambiente tregtare dhe një hotel në pronësi të saj.
Që prej marsit 2018, kur u bashkia miratoi vendimin “Për përcaktimin e procedurës dhe negocimin me zhvilluesit privatë që shprehin interesin që të bashkëpunojnë me Bashkinë e Tiranës, nëpërmjet marrëveshjeje të sipërmarrjes/shkëmbimit për pronat në pronësi të saj”, Bashkia Tiranë mund t’i falë kompanive private pronat publike në këmbim të disa ambienteve apo shërbimeve ndaj bashkisë.
