Agjensia për ilaçet në BE do të mbajë një takim të jashtëzakonshëm për të vendosur nëse do të miratojë vaksinën kundër koronavirusit të kompanisë Pfizer/ BioNTech deri më 29 dhjetor, sipas drejtueses të agjencisë, Emer Cooke.
Njoftimi, i bërë të mërkurën në një takim jozyrtar të ministrave të shëndetësisë të Evropës, vjen pasi Britania e Madhe autorizoi vaksinën kundër koronavirusit, duke e bërë atë vendin e parë perëndimor që miraton vaksinën.
Cooke, e cila mori drejtimin e Agjencisë Evropiane të Ilaçeve muajin e kaluar tha se do të shqyrtohet gjatë mbledhjes vendimi i marrë nga autoritetet e Mbretërisë së Bashkuar për të miratuar vaksinën.
Britania e Madhe autorizoi përdorimin e vaksinës Pfizer, të mërkurën, duke u bërë vendi i parë perëndimor që autorizon përdorimin e një vaksine kundër koronavirusit.
Autoriteti britanik i ushqimit dhe barnave i dha të drejtën qeverisë të miratojë përdorimin e vaksinës nën një ligj të veçantë përpara 1 janarit.
Dozat e para të vaksinës do të mbërrijnë në Britani në ditët e ardhshme, tha një zëdhënës i kompanisë. Britania ka blerë 40 milionë doza të vaksinës deri më tani.
