Lëvizja Socialiste për Integrim paditi sot në Prokurori Kryeministrin Edi Rama lidhur me deklaratat e Ramës ku fton policinë të marrë vota për PS-në.
“Edi Rama shkel ligjin kur fton policinë të marrë vota për PS-në. Thirrje e Ramës për policinë e shtetit përbëjnë ngjarjen më të rëndë të thyerjes së ligjit. Kryeministri i vendit me këtë thirrje ka shkelur të gjithë hierarkinë shtetërore të akteve ligjore.Thirrjet e Ramës thyejnë rëndë moralin e detyrës së një Kryeministri gjatë një fushatë elektorale në këto 25 vjet. Kjo ngjarje dhe kjo veprimtari është në kundërshtim me Kushtetutën dhe gjithë ligjet,” shkruhet në deklaratën e LSI.
LSI, ende pjesë e koalicionit qeverisë me PS, thekson se Zoti Rama ka shkelur jo vetëm Kushtetuetën, por dhe VKM-në e fundit, e miratuar si “pjellë e marrëveshjes politike të datës 17-18 maj 2017”.
Përveç hetimeve, LSI ka kërkuar dhe kontroll mjekësor të Zotit Rama për të verifikuar nëse ai është i aftë mendërisht ose jo, që të kryejë detyrën e Kryeministrit.
“Nga këto deklarata tregohet qartë se nuk është në gjëndje të qëndrueshme mendore. Nëse një tronditje e tillë psikike, vjen si pasojë e panikut, prej fuqisë së rritjes së mbështetjes popullore për LSI, sërish nuk është aspak shkak për përjashtim nga përgjegjësia penale dhe politike.”
LSI i kërkoi Presidentit Nishani mbledhjen e Këshillit të Sigurisë Kombëtare për analizimin e veprimeve antiligjore të Kryeministrit Rama.
