Pas urdhërit të Gjykatës së Posaçme për sekuestrimin e pronave të Ylli Ndroqit, pronarit të televizionit Ora News, organizatat ndërkombëtare të mbrojtjes së lirisë së shtypit, duke përfshirë Qendrën Europiane për Median dhe Lirinë e Shtypit, thanë se po shqyrtojnë çështjen para se të lëshonin një deklaratë zyrtare.
Ata konfirmuan se kishin marrë dijeni për ngjarjen, por thanë se duhej të përcaktonin natyrën e akuzave kundër Ndroqit, kontekstin e ngjarjes dhe mënyrën se si ndërhyri policia dje në ambientet e Ora News. Pasi të jenë informuar, ata do të vendosin nëse kategorizohet si një kërcënim kundër lirisë së mediave.
Në 3 gusht, Ylli Ndroqi u ndalua nga forcat speciale pranë zonës së TEG-ut, në Tiranë. Me kërkesë të SPAK-ut, Gjykata Speciale kishte lëshuar urdhër për sekuestrimin e 26 pasurive të Ndroqit.
Sipas njoftimit zyrtar, SPAK ka dyshime se Ndroqi ka qenë i përfshirë në aktivitete kriminale në Turqi, Itali e Shqipëri, dhe se pasuria e tij në Shqipëri është vënë me të ardhura të përfituara nga aktiviteti krimal.
Avokatët e Ndroqit thanë se këto akuza janë politike dhe kanë lidhje me gjyqin që Ndroqi ka nisur kundër kryebashkiakut Erion Veliaj për shpifje dhe prishje imazhi.
SPAK sqaron se Ndroqi, i njohur dhe me emrin Xhemail Pasmaçiu, është arrestuar dy herë:
– Në 2 shtator 1998, policia e Stambollit ka arrestuar në flagrancë me 30.5 kg lëndë narkotike heroine, Ylli Ndroqi, i paraqitur me emrin Xhemail Pasmaçiu, dhe 6 persona të tjerë. Interpol Tirana ka konfirmuar të dhënat dhe rezultoi se Ylli Bahri Ndroqi, i datëlindjes 11.03.1965, lindur dhe banues në Tiranë, është i njëjti person me Xhemail (Xhemal) Pasmaciu (Pasmaçiu), i arrestuar në Turqi.
– Në vitin 2004, po ashtu, në Itali, Ylli Ndroqi (alias Xhemail Pasmaciu), është referuar tek Autoritetet Gjyqësore në përfundim të një operacioni, si organizator i trafikut të drogës për llogari të një grupi kriminal. Në vitin 2006, prokuroria e Milanos lëshoi urdhër arresti për Ndroqin. Ai u arrestua në 17 shkurt 2015, bazuar në urdhër arrestin e lëshuar në vitin 2006.
SPAK ka kërkuar sekuestrimin e pasurive në emër të Ndroqit ku përfshihen: aksionet në kompanitë Ora, Yldon, REN-DON, Ecogades Landon Balcan, ALBANIA BAY MARINE, apartamente në Tiranë e Durrës, 5 makina, disa sipërfaqe tokash, 100 mijë metër katrorë sipërfaqe pylli në Lanabregas, etj.
SPAK dyshon se Ndroqi nuk ka burime të ligjshme për vënien e kësaj pasurie.
Shoqëritë që kanë aktivitet, përfshirë dhe mediat televizive, do vazhdojnë aktivitetin e tyre, por të administruara nga Agjencia për Administrimin e Pasurive të Sekuestruara dhe të Konfiskuara.
