Këshilli i Lartë Gjyqësor ka shtyrë për të disatën herë vendimin për gjyqtaren e Krujës, Enkeleda Hoxha.
Seanca e rradhës do të mbahet në 11 mars. Gjatë seancës së sotme, Inspektori i Lartë i Drejtësisë, Artur Metani pranoi shtyrjen por me disa ditë për shkak të situatës ku ndodhet gjyqtarja.
Ai ka argumentoi se gjyqtarja ka bërë shkelje të rënda ligjore dhe duhet të shkarkohet.
Kjo është hera e disatë që KLGJ nuk merr një vendim për gjyqtaren Hoxha.
Procesi ndaj saj ka nisur që me 8 janar, ku KLGJ caktoi seancën dëgjimore për gjyqtaren Hoxha. KLGJ shtyu më pas në 29 janar vendimin për shkarkimin ose jo të gjyqtares. Vendimi erdhi pas kërkesës së gjyqtares Hoxha, e cila kërkoi më shumë kohë për të përgatitur mbrojtjen e saj.
Më 29 janar, KLGJ shtyn për herë të dytë vendimin për Hoxhën me të njëjtin argument si më sipër.
Në 11 shkurt, Prokuroria e Posaçme e arrestoi gjyqtaren nën akuzën e korrupsionit. Sipas SPAK, gjyqtarja do të lironte një të dënuar me 25 vite burg.
Këshilli u mblodh me 16 shkurt ku vendosi të shtyjë sërish vendimin për gjyqtaren e Krujës. Vendimi i vetëm ndaj gjyqtares deri më sot është pezullimi nga detyra. Kjo vjen si kërkesë e ligjit për statusin e gjyqtarit. Sipas tij gjyqtarja duhet të pezullohet nga detyra deri në përfundim të hetimeve dhe marrjen e një vendimi të formës së prerë.
Ndërkohë gjyqtarja Hoxha ndodhet në arrest me burg që prej 11 shkurtit.
Gjyqtarja Hoxha njihet si ‘avokatja mbrojtëse’ që ka mundësuar lirimin e parakohshëm të disa kriminelëve të dënuar me burgim të përjetshëm.
Exit Neës ka shkruar më parë se si gjyqtarja Hoxha ka liruar Endrit Doklen, Hekuran Billon, Genc Tafilin dhe Ilir Pajën, përmes një skeme të njëjtë.
