Zona e Plazhit në Durrës ka mbetur pa energji elektrike, të premten, si pasojë e përmbytjeve.
Kreu i OSHEE-së Plator Mehmeti, në një intervistë për Report Tv, tha se situata është delikate në Durrës.
Mehmeti njoftoi se janë 3 kabina elektrike pa energji elektrike që nga dita e enjte. Si pasojë e kësaj ndërprerjeje, 3 pallate kanë mbetur pa energji elektrike prej dy ditësh tashmë.
Ai tha se po bëhen përpjekje për të ndërhyrë por shtoi se situata është e vështirë.
Gjatë intervistës Mehmeti tha:
“Specialistët janë në terren dhe po tentojnë që të provojmë dhe njëherë. Rajoni i jonë mund të mbulojë Rrogozhinën deri në Krujë. Është me investime më të shumta. Niveli i ujit shumë i lartë, po punojmë.”
Bashkia e Durrësit ka njoftuar se për shkak të daljes nga shtrati të lumenjve Erzen e Ishëm, duke mbushur tej kapacitetit kanalet kulluese, janë përmbytur toka bujqësore, banesa, rrugë e biznese.
Në njësinë Administrative nr. 6 rreth 15 banesa që ndodhen nën nivelin e rrugës ka depërtuar uji, njoftoi Bashkia e Durrësit.
