Qeveria ka vendosur të japë një ndihmë financiare për familjen e Klodian Rashës, i cili u vra nga një polic më 8 dhjetor.
Me vendim të Këshillit të Ministrave, qeveria i jep Qazim Rashës, babait të viktimës, një pension sa 8-fishi i pensionit social, ose gati 90 mijë lekë të reja.
Pak ditë pas vrasjes së të riut, kryeministri Rama vizitoi familjen e tij në datë 10, ndërsa një ditë më vonë ai ka miratuar vendimin për pension.
Vrasja e 25-vjeçarit ka nxitur reagime te qytetarët dhe protesta në disa qytete prej 5 ditësh. Dhjetëra të rinj e adoleshentë janë arrestuar nga policia.
