Në vend do të ndërtohen dy aeroporte, në Vlorë dhe në Sarandë dhe dy aerodrome në Gjirokastër.
“Shpresoj që këto ditë të kemi fituesin e garës ndërkombëtare që u bë si legjenda e Rozafës, pandemia, hapje-mbyllje, kredia, etje. Këtu në Gjirokastër bëhet fjala për dy aerodrome, që do të jenë turistike”, premtoi Kryeministri Edi Rama në një takim elektoral në qytetin e Gjirokastrës. Ai u shoqërua nga drejtuesi politik i qarkut, Blendi Cuci.
Qeveria ka rihapur në nëntor 2020 për të tretën herë radhazi garën ndërkombëtare për ndërtimin e aeroportin e Vlorës.
Ndërsa, 36 organizata në mbrojtje të mjedisit, vendase dhe të huaja, i kanë kërkuar qeverisë Rama që të anulojë ndërtimin e aeroportit të Vlorës, në Akërni, brenda zonës ‘Peizazhi i Mbrojtur Vjosë-Nartë’.
Ndërkohë ka filluar ndërtimi i aeroportit të Kukësit, i cili sipas kryeministrit përfundon në 2021. Siç Exit News ka shkruar më parë, aeroporti i Kukësit i është dhënë me koncesion për 35 vjet bashkimit të kompanive Bami shpk dhe Global Technical Mechanics shpk, dy kompani pa eksperienca të mëparshme në fusha të ngjashme.
