Fondi Monetar Ndërkombëtar vazhdon të theksojë rrezikun e madh që i vjen ekonomisë shqiptare nga dhënia pa vlerësim e PPP-ve dhe borxhi i lartë publik.
Në raportin e radhës për Shqipërinë, FMN kritikon dhe mjedisin e vështirë për biznesin e sipërmarrjet e huaja, si dhe dobësinë e institucioneve dhe sistemit të drejtësisë.
Më poshtë është një përmbledhje e gjetjeve të FMN-së:
– Ekonomia shqiptare ka vazhduar të forcohet, me një rritje reale të PBB-së rreth 3.8 për qind (në terma vjetorë) gjatë vitit 2017, duke reflektuar projekte të mëdha nga investimet e huaja direkte dhe investimet në ndërtim. Kjo situatë nuk mund të zgjasë pa një shtytje të konsiderueshme për reformat strukturore.
– Në ekonominë shqiptare ka rreziqe të larta, që rrjedhin nga borxhi i lartë publik, huatë me probleme në sektorin financiar, dobësi në institucionet publike dhe në sistemin gjyqësor, dhe mungesa e investimeve të reja të mëdha.
– Ndikimi i PPP-ve në buxhet dhe në qëndrueshmërinë e borxhit duhet të vlerësohet me kujdes.
– Borxhi publik mbetet ende i lartë, kreditë e këqija po ashtu.
– Vendi ende nuk është duke përfituar plotësisht nga kostoja e ulët e punës dhe afërsia me BE-në për shkak të një mjedisi të vështirë biznesi që pengon investimet.
– Autoritetet përkatëse duhet të përmbahen nga ulja e normave tatimore, dhënia e përjashtimeve të reja tatimore ose trajtime preferenciale tatimore që mund të komplikojnë sistemin e taksave.
